ភ្នំពេញ៖ អគ្គមេបញ្ជាការរង និងជាមេទ័ពជើងគោក លោកឧត្តមសេនីយ៍ឯក ហ៊ុន ម៉ាណែត បានឱ្យដឹងថាលោកបានទទួលប្រាក់ខែដំបូងពីរដ្ឋក្នុងពេលដែលលោករៀនពីឆ្នាំ១៩៩២ ដល់ឆ្នាំ១៩៩៣ ចំនួន ៥០០រៀលក្នុង១ខែ។

លោក ហ៊ុន ម៉ាណែត បានសរសេរនៅលើហ្វេសបុកផេករបស់លោកនៅព្រឹកថ្ងៃទី២៩ ខែវិច្ឆិកា ឆ្នាំ២០២២នេះ ដោយបានបង្ហាញនូវឯកសារទទួលស្គាល់សិស្សពូកែទូទាំងប្រទេសផ្នែកអក្សរសិល្ប៍ និងគណិតវិទ្យា នៃមធ្យមសិក្សាកំរឹត២ សម្រាប់ឆ្នាំសិក្សា ១៩៩២-១៩៩៣ ដោយក្រសួងអប់រំ។ លោក ហ៊ុន ម៉ាណែត គឺជាសិស្សទទួលបានចំណាត់ថ្នាក់លេខ១ ជាសិស្សពូកែទូទាំងប្រទេស ផ្នែកគណិតវិទ្យា។

ក្នុងឯកសារនេះក៏បានបញ្ជាក់ពីប្រាក់ខែសិស្សពូកែដែលត្រូវទទួលបានផងដែរ។

លោក ហ៊ុន ម៉ាណែត បានសរសេរថា៖ «ឯកសារនេះក៏បានបង្ហាញពីប្រាក់ខែដំបូងបង្អស់នៅក្នុងជីវិតរបស់ខ្ញុំ (ចំនួន៥០០រៀល ក្នុងមួយខែ) ដែលជាប្រាក់រង្វាន់សម្រាប់សិស្សពូកែចំណាត់ថ្នាក់លេខ១ ទូទាំងប្រទេសនៅពេលនោះ»។

លោកបានអរគុណដល់លោក Norak Renon ដែលបានផ្ញើរឯកសារអោយរូបលោក៕